លោកគ្រូ អ្នកគ្រូ សិស្សានុសិស្ស មានក្តីសប្បាយរីករាយ ខណៈទទួលបាន អគាសិក្សាថ្មថ្មីមួយខ្នង ដែលមាន៥បន្ទប់ មានបំពាក់កង្ហារ អំពូលភ្លើង ដោយបានសម្ពោធន៍ដាក់ឲ្យប្រើប្រាស់ជាផ្លូវ នៅសាលាបឋមសិក្សាកណ្តាលកោះត្បូង ស្ថិតក្នុងឃុំកោះសូទិន ស្រុកកោះសូទិន ខេត្តកំពង់ចាម ។
ដើម្បីឆ្លើយតបទៅនឹងតម្រូវការនៃកំណើនសិស្សានុសិស្សនៅក្នុងមូលដ្ឋាន ហើយតំបន់កោះមួយនេះជាតំបន់ងាយទទួលរងគ្រោះដោយទឹកជំនន់ជន់លិចផងដែរ។ ដោយមើលឃើញការលំបាករបស់សិស្សានុសិស្ស និងពង្រឹងលើកស្ទួយវិស័យអប់រំនៅតាមមូលដ្ឋានផងនោះ ដែលជាចំណងដៃ ដ៍ថ្លៃរបស់ សម្តេចសេនាវិបុលភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានផ្តល់អគារសិក្សាថ្ម មួយខ្នង មាន៥បន្ទប់ ដោយសាងសង់ឲ្យផុសពីទឹកជំនន់ ផងដែរ។ ពោលគឺ ធ្វើយ៉ាងផ្តល់កន្លែងសិក្សាដល់សិស្សានុសិស្សនៅតំបន់នេះឲ្យបានចូលរៀនគ្រប់ៗគ្នា ដើម្បីអភិវឌ្ឍន៍វិស័យអប់រំឲ្យកាន់តែប្រសើរឡើង។
ជាក់ស្តែង នៅព្រឹក ថ្ងៃទី២៨ ខែសីហា ឆ្នាំ២០១៩ ឯកឧត្ដម ខៀវ កាញារីទ្ធ រដ្ឋមន្ត្រី ក្រសួង ព័ត៌មាន និងជាប្រធានក្រុមការងារថ្នាក់ជាតិចុះជួយស្រុកកោះសូទិន និងលោកជំទាវ បានអញ្ជើញ ជាគណអធិបតីភាព សម្ពោធដាក់ឲ្យប្រើប្រាស់អគាសិក្សាមួយខ្នង មាន៥បន្ទប់ នៅសាលាបឋមសិក្សាកណ្តាលកោះត្បូង ស្ថិតក្នុងឃុំកោះសូទិន ស្រុកកោះសូទិន ខេត្តកំពង់ចាម ហើយ ឯកឧត្ដម គណអធិបតីបានថ្លែងថា នេះដោយសារប្រទេសជាតិមានភាពសុខសាន្ត សុខសន្តិភាព សុវត្ថិភាព ល្អ ទើបមានការរីកចម្រើ នគ្រប់វិស័យនៅតាមជនបទ តំបន់ដាច់ស្រយាលដូចពេលនេះ ។ ហើយអគារសិក្សាថ្មីមួយនេះកសាងឡើងដើម្បីទុកឲ្យកូនចៅជំនាន់ក្រោយក្រេបយកចំណេះដឹង ដើម្បីកសាងអភិ វឌ្ឍន៍ខ្លួនក្លាយជាទំពាំងស្នងឬស្សី និងជាសសរទ្រូងនៃប្រទេសជាតិផងដែរ។
គូសបញ្ជាក់ផងដែរថា លោកគ្រូ អ្នកគ្រូ និងសិស្សានុសិស្ស នៃបឋមសិក្សាកណ្តាលកោះត្បូង ឃុំកោះសូទិន បានសម្តែងអារម្មណ៍សប្បាយរីករាយ ខណៈទទួលបានអគារបង្រៀន និងសិក្សាថ្មី ដោយមានផាសុខភាពល្អ មានកង្ហារ និងមិនមានការព្រួយបារម្ភអំពីមេឃភ្លៀងម្តងៗ ដូចកាលពីមុនឡើយ៕