ជាការចូលរួមចំណែកសម្រួល ដល់គ្រួសារខ្មែរឥស្លាម ដែលកំពុងជួបការលំបាក ក្នុងជីវភាព លោកជំទាវ អនហេង លក្ខិណា ប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត សហការជាមួយសហគមន៍សានិកខ្មែរឥស្លាម កាលពីថ្ងៃទី២១ ខែសីហា ឆ្នាំ២០១៩ នេះ បានដឹកនាំប្រតិភូ ចុះទៅសុខទុក្ខ និងនាំយកសម្ភារៈប្រើប្រាស់ ទៅផ្តល់ជូនលំនៅដ្ឋានប្រជាពលរដ្ឋ ជួបការលំបាក នៅភូមិរកា សង្កាត់សំបួរមាស ក្រុងកំពង់ចាម ។
នាកាសនោះ លោកជំទាវ អនហេង លក្ខិណា មានប្រសាសន៍ថា បន្ទាប់ពីបានទទួលព័ត៌មានថា មានប្អូនប្រជាពលរដ្ឋយើង ចំនួន ១៣គ្រួសារកំពុងប្រឈមទៅនឹងការលំបាក ក្នុងផ្នែកជីភាពប្រចាំថ្ងៃ ថ្ងៃនេះ គណៈកម្មាធិការពិគ្រោះយោបល់កិច្ចការស្ត្រី និងកុមារខេត្តកំពង់ចាម និងបងប្អូនខ្មែរសានិកខ្មែរឥស្លាម
ក៏បានឯកភាពគ្នា ចុះមកសួរសុក្ខទុក្ខ និងនាំមកជាមួយនូវកង់ ចំនួន ១៣គ្រឿង ដែលជាអំណោយរបស់លោក ស្លេះ ពុនយ៉ាមីន អនុប្រធានប្រធានសហភាពសហព័ន្ធយុវជនកម្ពុជា ខេត្តកំពង់ចាម ដើម្បី ចែកជូនបងប្អូនយើង ទុកសម្រាប់ប្រើប្រាស់ និងអោយកូន ធ្វើជាមធ្យោបាយទៅសាលារៀន ។
ជាមួយនោះ លោកជំទាវប្រធាន ក៏បានសំណូមពរ ទៅដល់មាតា បិត ឬអាណាព្យាបាល សូមជួយជម្រុញកូន ចៅ ឲ្យទៅសាលារៀន ឲ្យបានទៀងទាត់ ដើម្បី ទទួលបានចំណេះដឹងខ្ពង់ខ្ពស់ និងទទួលបានការងារធ្វើដែលជម្រុញធ្វើឲ្យជីវភាពរស់នៅ កាន់តែប្រសើរឡើង ខណៈដែល បច្ចុប្បន្ន សង្គមជាតិយើងកំពុងតែមានការអភិវឌ្ឍរីកចម្រើន ក្នុងតំបូលសន្តិភាពនោះ ។ទន្ទឹមនឹងនោះ ត្រូវចេះថែរក្សាអនាម័យ ដោយសម្អាត បរិស្ថាន ជុំវិញផ្ទះ ជាប់ជាប្រចាំ តាមរយៈ ហូបស្អាត ផឹកស្អាត និង រស់នៅស្អាត ដើម្បី ទទួលបានសុខភាពល្អ ជៀសផុតជម្ងឺទាំងឡាយ ដែលនាំអោយប៉ះពាល់ ដល់សុខភាព និងជីវភាពគ្រួសារ ៕
