កំពង់ចាម៖ នៅព្រឹកថ្ងៃ ព្រហស្បត្តិ៍ទី ៦កើត ខែទុតិយាសាឍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី ១៥ ខែ កក្កដា ឆ្នាំ ២០២១ នេះ ស្ថិតនៅក្នុងទីតាំង មន្ទីរពេទ្យបង្អែកស្រុកចំការលើ នាខេត្តកំពង់ចាម ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មការខេត្ត ប្រយុទ្ធប្រឆាំងនឹងជំងឺកូវីត-១៩ បានអញ្ជើញជាអធិបតីក្នុងពិធីប្រកាសបើកយុទ្ធនាការ លើកទី៣ នៃការចាក់វ៉ាក់សាំងបង្ការ ការពារ ជំងឺកូវីត-១៩ ជូនប្រជាពលរដ្ឋ ចាប់ពីអាយុ ១៨ ឆ្នាំឡើងទៅ ដោយឥតគិតថ្លៃ ចាប់ពីថ្ងៃទី ១៥ ខែកក្កដា ឆ្នាំ ២០២១ នេះទៅ ។
ស្ថិតនៅក្នុងបរិយាកាសប្រកបដោយ សេចក្តីសោមនស្សរីករាយនេះផងដែរ ឯកឧត្តម អ៊ុន ចាន់ដា ក៏បានពាំនាំពាក្យ សួរសុខទុក្ខ នឹងសេចក្តីនឹករលឹកពីសំណាក់ សម្តេចអគ្គមហាសេនាបតី តេជោ ហ៊ុន សែន ប្រមុខរាជរដ្ឋាភិបាលកម្ពុជា ដែលតែងតែខិតខំ ប្រឹងប្រែង អស់លទ្ធភាព ដើម្បីប្រយុទ្ធប្រឆាំងនឹងជំងឺកូវីទ-១៩ ពង្រឹងការការពារ សុខភាពសាធារណៈ នៅកម្ពុជា ។ ឯកឧត្តមក៏បានផ្តាំផ្ញើ សូមអោយបងប្អូន ប្រជាពលរដ្ឋទាំងអស់គ្នា បង្កើនការប្រុងប្រយ័ត្ន ថែរក្សាសុខភាពរៀងៗខ្លួន និងអនុវត្តវិធានការសុខាភិបាល ៣កុំ ៣ការពារ និងចូលរួមចាក់វ៉ាក់សាំងអោយបានគ្រប់ៗគ្នា ។
ដោយឡែក យុទ្ធនាការលើកទី៣ នៃការចាក់វ៉ាក់សាំងបង្ការការពារជំងឺកូវីដ-១៩ ជូនប្រជាពលរដ្ឋចាប់ពីអាយុ១៨ឆ្នាំឡេីងទៅនេះ ក៏បានប្រារព្ធពិធីបើកផងដែរ នៅក្នុងបណ្តាស្រុក ចំនួន ៤ ផ្សេងទៀតផងដែរ រួមមាន៖ ស្រុកកោះសូទិន ស្រុកស្រីសន្ធរ ស្រុកស្ទឹងត្រង់ និងស្រុកកងមាស ដោយមានការអញ្ជើញចូលរួមជាអធិបតីពីសំណាក់ ឯកឧត្តម និងលោកជំទាវ អភិបាលរងនៃគណៈ អភិបាលខេត្តកំពង់ចាម ផងដែរ ៕
