កាលពីថ្ងៃទី០២ ខែសីហា ឆ្នាំ២០១៥ នៅស្នាក់ការគណបក្សប្រជាជនកម្ពុជាខេត្តកំពង់ចាម មានប្រារព្វពីធី ប្រកាសក្រុមការងារជនបង្គោលយុវជនថ្នាក់កណ្ដាលចុះជួយខេត្តកំពង់ចាម យ៉ាងមហោឡារិក ក្រោមអធិបតីភាព ឯកឧត្តម លន់ លឹមថៃ ប្រធានគណៈកម្មាធិការគណបក្សខេត្តកំពង់ចាម និង ឯកឧត្តម ហ៊ុន ម៉ាណែត អនុប្រធានក្រុមការងារគណៈកម្មាធិការកណ្ដាលចុះជួយខេត្តកំពង់ចាម ទទួលបន្ទុកក្រុមការងារយុវជន ដោយមានការអញ្ជើញចូលរួមពីក្រុមងារជនបង្គោលយុវជនគណបក្សថ្នាក់កណ្ដាល លោកប្រធានគណបក្សក្រុង/ស្រុក ប្រធាន/អនុប្រធាន សមាជិក/សមាជិកា ក្រុមការងារយុវជនខេត្ត ប្រធាន/អនុប្រធានក្រុមការងារយុវជនក្រុង/ស្រុក សរុបចំនួន ១៩៩ នាក់ ស្រី ២៩នាក់ ។
បន្ទាប់ពីមតិស្វាគមន៍ របស់លោក ស្រី សុភ័ក្ត្រ ប្រធានក្រុមការងារយុវជនគណបក្សខេត្ត និងការអាននូវសេចក្ដីសម្រេចចិត្តរបស់គណៈអចិន្ត្រៃយ៍គណបក្សខេត្ត ស្ដីពីការចាត់តាំងក្រុមការងារជនបង្គោលយុវជនគណបក្សចុះជួយខេត្តរួចមក ឯកឧត្តម ហ៊ុន ម៉ាណែត អនុប្រធានក្រុមការងារគណៈកម្មាធិការកណ្ដាលចុះជួយខេត្តកំពង់ចាម ទទួលបន្ទុកក្រុមការងារយុវជន បានឡើងមានមតិ ដោយបានថ្លែងអំណរគុណ និងធ្វើការវាយតម្លៃខ្ពស់ចំពោះការខំប្រឹងប្រែងរបស់គណបក្ស និងក្រុមការងារគ្រប់ថ្នាក់ ក្នុងការគាំទ្រសកម្មភាពរបស់ក្រុមការងារយុវជន បម្រើឲ្យបុព្វហេតុរបស់គណបក្សប្រជាជនកម្ពុជា និងប្រទេសជាតិ ។ ឯកឧត្តម ហ៊ុន ម៉ាណែត ក៏បានលើកឡើងគូសបញ្ជាក់ផងដែរអំពីប្រវត្តសកម្មភាពរបស់ជនបង្គោលក្នុងខេត្តកំពង់ចាម ដែលបានចាប់ផ្តើមរៀបចំឡើងក្នុងឆ្នាំ២០១២ មានសមាជិកចំនួន ៤៥រូប និងមកដល់បច្ចុប្បន្នបង្កើនរហូតដល់ ១៩៦រូប ចុះជួយក្រុង/ស្រុក និងមាន១៥រូបចល័ត ។ ក្រុមការងារជនបង្គោលយុជន មានផែនការសកម្មភាព និងគោលដៅគឺ ៖ បង្កើនជំនឿទុកចិត្តនិងគាំទ្រដល់កម្មវិធីនយោបាយរបស់គណបក្ស ក៏ដូចជាបង្កើនការយកចិត្តទុកដាក់រៀបចំចាត់តាំងធ្វើផែនការសកម្មភាពជាក់ស្ដែងនិងបានច្បាស់លាស់នៅមូលដ្ឋាន ជាពិសេសសកម្មភាពផែនការអភិវឌ្ឍមូលដ្ឋាន ឆ្លើយតបចំពោះតម្រូវការចំពោះមុខ ជួយការពារគណបក្ស ការពារអំពើល្អនិងសមិទ្ធផលទាំងឡាយដែលគណបក្សបានកសាងឡើង ជាផ្នែកមួយរបស់ក្រុមការងារចុះជួយក្រុងស្រុក រួមសកម្មភាពដើម្បីគណបក្សទាំងអស់គ្នា ។ ចុងក្រោយ ឯកឧត្តម បានសង្កត់ធ្ងន់ថា៖ ក្រុមការងារជនបង្គោលយុវជនចុះជួយក្រុង/ស្រុក ត្រូវតែមានរបៀបរបបធ្វើការងារល្អ ជាមួយគណបក្ស និងក្រុមការងារនៅមូលដ្ឋាន ធានាឲ្យបាននូវសាមគ្គីឯកភាពផ្ទៃក្នុង ដើម្បីជោគជ័យរបស់គណបក្ស “ មានតែសាមគ្គីភាពទេ ដែលធ្វើឲ្យយើងសម្រេចបាន នូវទិសដៅនិងផែនការសំខាន់ៗដែលគណបក្សបានដាក់ចុះ បើគ្មានសាមគ្គីយើងពិតជាពុំអាចទៅណារួចទេ ។
មានមតិបូកសរុបបិទអង្គពិធី ឯកឧត្តម លន់ លឹមថៃ ប្រធានគណៈកម្មាធិការគណបក្សខេត្ត បានថ្លែងអំណរគុណ ព្រមទាំងវាយតម្លៃខ្ពស់ចំពោះ ឯកឧត្តម ហ៊ុន ម៉ាណែត ព្រមទាំងក្រុមការងារជនបង្គោលយុវជនគណបក្សទាំងអស់ ដែលបានខិតខំប្រកបដោយការលះបង់ ក្នងការជួយដល់មូលដ្ឋានក្នុងខេត្តកំពង់ចាម ជាពិសេសផ្តោតលើការងារកសាងកម្លាំងក្នុងយុវជន ។ ឯកឧត្តមប្រធានគណបក្សខេត្ត ក៏បានធ្វើការរំលឹកដាស់តឿនបន្ថែម សូមឲ្យប្រធានក្រុមការងារយុវជនខេត្ត ខិតខំធ្វើផែនការសកម្មភាពរួម។ ព្រមជាមួយនោះ ឯកឧត្តម ក៏បានអំពាវនាវសូមឲ្យគណបក្ស និងក្រុមការងារនៅមូលដ្ឋាន សហការនិងគាំទ្រក្រុមការងារជនបង្គោល និងក្រុមការងារយុវជនរបស់យើងជួយបង្កលក្ខណៈឲ្យធ្វើសកម្មភាពបម្រើគណបក្សបានល្អ និងទទួលបានជោគជ័យត្រចះត្រចង់ ។
អង្គពិធីបានចប់សព្វគ្រប់ នៅវេលាម៉ោង ១១,០០ ក្នុងបរិយាកាសសោមនស្សរីករាយ ។
