ពិធីបើកសន្និបាតបូកសរុបលទ្ធផលការងារប្រចាំឆ្នាំ ២០១៨ និងលើកទិសដៅការងារសំរាប់អនុវត្តឆ្នាំ ២០១៩ របស់រដ្ឋបាលខេត្តក្រោមធិបតីភាពឯកឧត្តម ខ្លួន ផង ប្រធានក្រុមប្រឹក្សាខេត្តនិងឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម និងជាប្រធានគណបក្សខេត្ត និងមានការអញ្ជើញចូលរួមពីសំណាក់ លោកលោកស្រីអភិបាលអភិបាលរង ក្រុង ស្រុក ប្រធានអនុប្រធានមន្ទីរអង្គភាពជុំវិញខេត្ត និង មេឃុំទាំងទូទាំងខេត្ ព្រមទាំង រដ្ឋបាលប៉ុស្តិ៍ទូទាំងខេត្ត ប្រមាណជា ៥៥០នាក់។ កម្មវិធីនេះបានប្រព្រឹត្តឡើងនៅព្រឹកថ្ងៃចន្ទ ៦ កើត ខែផល្គុន ឆ្នាំច សំរឹទ្ធិស័ក ពស ២៥៦២ ត្រូវនឹងថ្ងៃទី ១១ ខែមីនា ឆ្នាំ ២០១៩ ។
មានប្រសាសន៍បើកអង្គសន្និបាតនាឱកាសនោះ ឯកឧត្តម គួច ចំរើនអភិបាលនៃគណៈអភិបាលខេត្តកំពង់ចាម ក៏បានគូសបញ្ជាក់ថា ការប្រារព្ធបើកអង្គសន្និបាតបូកសរុបលទ្ធផលការងារឆ្នាំ២០១៨ និង លើកទិសដៅ អនុវត្តបន្តឆ្នាំ២០១៩ របស់រដ្ឋបាលសាលាខេត្តកំពង់ចាម នាពេលនេះ គឺជាការឆ្លុះបញ្ចាំងនូវឲ្យឃើញពីស្នាដៃ លទ្ធផលការងារគ្រប់បណ្តាអង្គភាព មន្ទីរ ស្ថាប័នជុំវិញខេត្ត សម្រេចបានក្នុងរយៈពេលមួយឆ្នាំមកនេះ ក្នុងការអនុវត្តកម្មវិធីនយោបាយកំណែទម្រង់របស់រាជរដ្ឋាភិបាលកម្ពុជា នូវគោលនយោបាយយុទ្ធសាស្រ្ត ចតុកោណដំណាក់កាលទី៤ នៃអាណត្តិទី៦ ។ ឯកឧត្តមបានបន្ថែមទៀតថា ដើមី្បអោយតំណើរការរបស់អង្គសន្និបាតមានភាពផុសផុល ឯកឧត្តម បានបែងចែកអោយមានការពិភាក្សាជាក្រុម ដើម្បីស្វែងរកចំណុចខ្លាំង និងចំណុចខ្សោយរបស់ខ្លួនព្រមទាំង ប្រកបដោយចក្ខុវិស័យ និង ទទួលខុសត្រូវខ្ពស់ ហើយក៏ជាគន្លឹះ ក្នុងការអនុវត្តន៍សិទ្ធិអំណាច តួនាទីរបស់ស្ថាប័ន អង្គភាពរដ្ឋបាលគ្រប់លំដាប់ថ្នាក់ ក្នុងការឈានរៀបចំនូវផែនការ យុទ្ធសាស្ត្រថ្មី សម្រាប់អនុវត្តឲ្យបានជោគជ័យនាឆ្នាំខាងមុខ ។
ឯកឧត្តមអភិបាលខេត្ត ក៏បានផ្តាំផ្ញើដល់អស់លោក លោកស្រី ជាសមាជិកអង្គសន្និបាតទាំងមូល ត្រូវយកចិត្តទុកដាក់ខ្ពស់ ដោយផ្តោតទៅលើការងារសន្តិសុខ សណ្តាប់ធ្នាប់សាធារណៈ សំខាន់ការអនុវត្តគោលនយោបាយភូមិ ឃុំមានសុវត្ថិភាព របស់រាជរដ្ឋាភិបាលកម្ពុជា និងការអនុវត្តច្បាប់ ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌជាដើម ។
