នៅថ្ងៃទី២០ ខែកក្តដា ឆ្នាំ២០១៨ ឯកឧត្តម គួច ចំរើន អភិបាល នៃគណៈអភិបាលខេត្តកំពង់ចាម បានអញ្ជើញជាអធិបតីភាពដ៍ខ្ពង់ខ្ពស់ក្នុងពីធីប្រគល់ទោចក្រយានយន្តជូនប៉ុស្តិ៍នគរបាលរដ្ឋបាលឃុំ-សង្កាត់ទាំង ១០៩ឃុំ-សង្កាត់ក្នុងខេត្តកំពង់ចាម នៅស្នងការដ្ឋាននគរបាលខេត្តកំពង់ចាម នូវទោចក្រយាន (ម៉ូតូ) ចំនួន១០៩គ្រឿង ដែលជាអំណោយដ៍ថ្លៃថ្លារបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីទុកបំរើការកិច្ចការងាររដ្ឋបាល និងការបម្រើសេវាសាធារណ:ជូនប្រជាពលរដ្ឋឲ្យកាន់តែល្អប្រសើរឡើង។
ក្នុងឱកាសនោះ ឯកឧត្តម គួច ចំរើន បានលើកឡើងថា ទោចក្រយាន (ម៉ូតូ) ដែលត្រូវបានចែកជូនតាមប៉ុស្តិ៍នគរបាលរដ្ឋបាលក្នុងមូលដ្ឋាន១០៩ប៉ុស្ដិ៍ នេះដើម្បីកាត់បន្ថយចំណុចអសកម្មក្នុងមូលដ្ឋាន ដោះស្រាយការពារសុវត្ថិភាពជូនប្រជាពលរដ្ឋ ឲ្យកាន់តែល្អ ដើម្បីជាប្រយោជន៍រួមក្នុងការបម្រើសេវាសាធារណៈតាមតួនាទីនិងកាតព្វកិច្ចរបស់ខ្លួន។ ឯកឧត្តមបានបន្តទៀតថា ក្នុងនាមជាកងកម្លាំង ត្រូវមានកាតព្វកិច្ចការពារសុខសន្តិភាព សុវត្ថិភាព និង បម្រើសេវាតាមតម្រូវការព្រមទាំងដោះស្រាយរាល់បញ្ហារបស់ប្រជាពលរដ្ឋដើម្បីបញ្ជៀសការកើតឡើងនូវបទល្មើស អំពើចោរកម្ម ល្បែងស៊ីសង និងភាពអាណាធិបតេយ្យ ត្រូវធានាលើកទឹកចិត្តទំនុកចិត្តខ្ពស់កាន់តែរឹងមាំ និងសុខសាន្តក្នុងការរស់នៅជាប្រចាំ ស្របតាមគោលនយោបាយភូមិ ឃុំ មានសុវត្ថិភាព របស់រាជរដ្ឋាភិបាលកម្ពុជា ដែលបានដាក់ចេញ ដើម្បីអោយមូលដ្ឋានយកទៅអនុវត្តន៍អោយមានប្រសិទ្ធភាពខ្ពស់។
ឯកឧត្តម បានបន្ថែមទៀតថា អ្វីដែលគួរកត់សម្គាល់ក្នុងរយពេលដំណើរការបោះឆ្នោត តាមគោលនយោបាយលិទ្ធប្រជាធិបតេយ្យត្រូវត្រៀមឯកសារទៅចូលរួមបោះឆ្នោតឲ្យបានគ្រប់ៗគ្នាក្នុងការជ្រើសរើសថ្នាក់ដឹកនាំប្រកបដោយការអភិវឌ្ឍន៍ និងរីកចម្រើន ជាពិសេសការពារសន្ដិភាពជូនប្រជាពលរដ្ឋដែរជាម្ចាស់ឆ្នោត។
មានប្រសាសន៍ផ្តាំផ្ញើ ក្នុងឱកាសនៅដែរ ឯកឧត្តម គួច ចំរើន បានស្នើសូមដល់កងកម្លាំង រួមនឹងមន្ត្រីពាក់ពន្ធ័នៅតែបន្តយកចិត្តទុកដាក់ តាមដានអាកាសធាតុ និងកម្រិតកម្ពស់ទឹកជាប់ជានិច្ច ត្រូវត្រៀមនូវឧបករណ៍ជួយសង្គ្រោះដូចជាថ្នាំសង្កូវ ទូក កាណូត ដើម្បីជួយសង្គ្រោះពលរដ្ឋរកទីទួលសុវត្ថិភាពដែលងាយរងគ្រោះក្នុងរដូវទឹកឡើងនេះ ហើយជូនដំណឹងដល់ប្រជាពលរដ្ឋឲ្យកាន់តែប្រុងប្រយត្ន៍ខ្ពស់ក្នុងការរស់នៅតាមដងទន្លេ។
